Las! que me sert

Las! que me sert, que si parfaitement
Louas jadis et ma tresse doree,
Et de mes yeus la beauté comparee
A deus Soleils, dont Amour finement

Tira les trets causez de ton tourment?
Ou estes vous, pleurs de peu de duree?
Et Mort par qui devoit estre honoree
Ta ferme amour et iteré serment?

Donques c’estoit le but de ta malice
De m’asservir sous ombre de service?

Pardonne moy, Ami, à cette fois,

Estant outree et de despit et d’ire
Mais je m’assur’, quelque part que tu sois,
Qu’autant que moy tu soufres de martire.

 

Sonnets

Louise Labé